EKO TEKO TOKI


Zera na tuka ate jo ngere iwa mozo. Eze ka poa peka, tapi piki jo iwa mozo raza. Rasa ki jao ngonggo eru wazo. Jao taku ema jo. Kai si’I jao mbana pizi heo nore uma. Kalo iwa, jao taku kai gera ne’e iwa pati jao doi sakola. Jao e wazo ata guru na’u ndeka sakola. “kalo libur na ma’e mera mozo. Harus zka ine ema miu. Ma’e zimba eru mera ka, ngere ana ko’o ‘ata daera’” Ndeka raza ate jo iwa mozo. Mbana honga wi mboka, keso honga wi sidi. Ndeka rua jao mboka sagho ragho pa. zao ne’e taku mesa mbenu mbeja sa tembo jo. Jao nara mbaze wazo nua. Mera eru ndeka sa’o. peke zonggo, jao sambu ne’e Baba Balo. Ne’e ate ndate jao iwa jadi mbaze wazo. Jao taku mea ne’e kai. Jao iwa mengga esa ne’e kai, kai mogha iwa pa aze nosi ne’e jao. Kai mbana ghazi pale ki. Jao dheko zonggo kai, tapi zombu iwa sai. “kalo iwa kai taku jara ki nitu roko” piki one uzu ote jao. Zae mogha ghena uma, jao zeze ata rita nangi. Jao mbana nge ghazi. Rita ki nge we’e. jao mbinge, rita ki nge mere. U’I jo kutu mbeja. Na kalo iwa nitu pa’I rita nangi. Apa wazi ndeka pu’u kaju mere woso na. kalo iwa nitu rita ndeka pu’u jita mere nore na. ozo piki ata iwa mozo, tau tamba taku mesa jao. Runga mulai mbenu sa tembo jao. U’I rasa ngere kuwi tazo ka. Jao so soda a’I ngere ndate, so paru ngere mbengo reo. Jao ngengu. Iwa mbeo zeze ata kera aze. “sai reze wawo?” “jao!!!” jao ndezu ko berani rewo i. “padaha kau nde…” Ine Rani ronga nia ki. “sai rita na??” jao aze wazo kai. “o.. na weta kau Ndete. Kai rita mboka ndewe. Jao si’I ma’e dheko, kai bhugu dheko.” Ine loku mulai zewa jawa. “kau wi mbana emba??” kai aze wazi. “jao wi mbana pizi heo nore ke’keke.” “mozo si, jao mbana ro!!!” jao mea ne’e Ine Rani. Jao pao so zama-zama taku zera petu i. jao haze zonggo, ine Rani pota ka. Kai iwa ka tei. Jao paru zimba peka tau nore uma. Ghena ndeka uma, jao busa sa lo’o ndeka zepa. Jao e wazo ndewe. Rasa ki wi tawa mesa. Padaha Ndete rita, jao e si nitu pai nangi. Selama na ata mbupu mogha ata ngga’e mere ngestei nitu pa’I. jao mulai iwa percaya ka. Na kalo iwa ebe zeze rongo me gho sai I rita ebe sodho nitu pa’I nangi. Jao mulai piki wazo. Nitu pa’I na iwa zatu. Na mozo ko kema tau ata mere muzu. Ata nembu. Ebe tau taku kita supaya ma’e poka rewo pu’u kaju. Ma’e poke teze rewo ana nake. Ma’e tuki jengi rewo ngebo. Kalo pu’u kaju iwa zatu, ana nake mogha iwa zatu kita jadi nggena mogha. Kodho zimba si sembuna. Ebe biasa cerita tentang ana weka. Kita sambuna iwa tei zimba tembo mere ko ana weka na ngere emba. Pale kita tei ndeka gambar mo reka one tivi. Ae ghone, ae rama, ae zengi, ae nggaja, ae zea, ae gana jadi mbere ni we’e ka karna puku kaju ebe poka poa mbeja ka. Kita perlu sa’o gaga. Sensor mbeja pu’u kaju mere, mbeja na iwa muza wazo. Idi!!, jao piki mbiraka zewa ka. Reza mbenu wewa ka. Jao zima zama mbana pizi heo. Za’e sai sa mbapa saku, eko teko nger dhogi reka kanga eko jo.jao taha I, eze rasa ro. Iwa ebho, ria ki dhu ndeka keze. Jao terpaksa mbaze wazo i. heo ata zatu na jao iwa I wangga. Bou zimba ndeka wewa zepa. Rasa ki zima jo fonga nggete embe. Ndeka sa’o jao tei ine jo mbaru bhaze wangga ne’e kaju. Jao rasa ki kasia wazo. Ebe eze mbupu peka na kema i. wangga ndate wazi. Ata su’u, ata doko, ata dhewi zatu penga. Padaha jao nore sakola mozo tuka tipu ine ne’e ema. Ata guru na’u si sa mburinggi, jao sodho si sangasu. Ebe doi iwa dhu ndeka sepu songgo doi ata. Ine jo kodho jao iwa aze. Kai mbana zimba tau nore zapu. Iwa ebho, ema jo mai.kai bhaze nai nio.nio uta, nio tape, ano dhoi sa ndeka we’e pake kabe nio. Jao e kawazi muri mera jao mena sakola.doi tau mbeta pakia baru, sepatu baru, mbana minu moke tau ozo sena jo. Padaha ebe ndia, mbana ghoma, mbana gereja, ndua nezu zimba pa zuka na zawo na. iwa perna gati. So sakola iwa lulus SMP ndeka rua ne’e taha kelas dua SMA sandeka. tapi jao iwa mea ne’e ozo imu so. Sakola tau ngama minu moke, pamata ne’e gagho ine weta ata. “kau mbaze ka nde…??” ema jo aze rapa. “jao eko teko toki nde.” “na nu, zaka zimba ozo zao ki. Dheko dhi teke miu ata zao zembi pa ngezo. Kema sa lo’o zetu pati zima eko teko toki. Ngonggo wi mera mozo nu. Na so wi mbana sakola ono si doi, wiji mozo…!!!”ema jog era zewa jawa pa. zima jo rasa nge ria. “kalo ine ema gera ma’e ndezu. Na ebe so moki naru.” Jao e wazo nasa SMP jo na’u. Nge ebho zima jo nge ro. Jao nesi tazo ka. Honga wi rita tapi jao taku ema jog era wazi. Iwa ebho kai rasa kasia, kai si’I jao mbana periksa nore polindes. Ndeka ibu bidan. Ndeka raza ata aze ona pa jao. Jao ndezu dhu moki mo zimba we’e. ghena nde polindes jao maso. “bhoe ebe reta one” jao niu. Wo fai sare ronga. Kai umi ne’e jao. Jao umi mogha tapi nesi we’e. jao ndu zonggo kai. So ghena we’e meja kai pati kursi jao ngambe. “kau tau apa nde..??” “jao wi periksa tuka ana ndie na…” jao tau lucu. Kai tawa mere. So gedu, kai umi wazo. Kai mea ne’e jao. Ana ndie sombo paleki, ngere kai ta ibu bidan, piki jao. “ibu bidan emba..??” jao aze wazo. “ibu bidan pa jao na…” kai ndezu ne’e umi. “o.. ma’e gera le, jao mbembo. Ibu bidan ata pa na sandeka na, gati ka..???” “iwa apa-apa le. Santé we. Ibu bidan ganti peka. Jao pa na wuza tezu ka.” Jao mulai piki rewo. Tei umi kai ata sare paleki. Ngestei kai alu manis pa. tawa kai tau tamba sare rupa ki. Kesa wazi ne’e ngi’I tusu ki. Kodho ki ngere ana ata raja ata jadi watu nore sewo zero.. So su’a mbeja kai pati ne’e obat. Oba sa boti ne’e pe ziwu rua esa rua ndeka one daluwa bhara. “baya sa apa??” jao aze wi bhaze. “iwa baya. Sambuna pake JAMKESMAS peka. Kau ata mai baru pa???” “o’o jao mbaru bhaze libur mai zau kupang. Iwa tezu peka jao mbaru bhaze sa ndeka na.” “jao bhaze ro… eh, jao kezo ka. Ibu bida ngara ngere sai??” jaongestei wazi. “marlin” kai ndezu ne’e umi. “ibu bidan zatu hape rusa???” “iwa zatu. Kau perbae mbeo pa???” “kalo nomor hape ata iwa I pake?? Jao mozo perbae sa esa we’e??” jao umi wazo. “perbae ko apa??” ibu bidan aze. “kalo ngaza na jao, perbae ate ko’o ibu las ne’e ate jao.” Jao tawa sa lo’o. “hmmm…” kai umi ka wazi. Jao bhaze ne’e umi mesa. Nomor hape ibu bidan jao baca ulang-ulang. Rasa eko teko ndewe ngere pota ka.

2 komentar:

Silahkan berkomentar, setelah membacanya.
Terima kasih